Fjórtan skipverjar af línuskipinu Valdimar GK frá Grindavík greindust með COVID-19 þegar skipið kom til hafnar í Njarðvík í morgun. Skipið kom til hafnar eftir rúmlega sólarhrings siglingu eftir veiðar skammt frá Hornafirði. Víðir Reynisson, yfirlögregluþjónn hjá Almannavörnum, staðfestir þetta í samtali við Viljann.
Áhöfnin var öll send í skimun hjá Heilbrigðisstofnun Suðurnesja. Niðurstaðan lá fyrir eftir hádegi í dag og eru skipverjarnir allir komnir í einangrun, og eru misveikir, en ekki er vitað hvernig þeir smituðust. Fyrstu þeirra fóru að finna fyrir veikindum, eftir löndun á Djúpavogi, en þar fór einn skipverji í land í skipulagt frí. Sá er einnig greindur með COVID-19.
Skipið liggur við bryggju í Njarðvík og verður sótthreinsað, og stendur til að landa aflanum á morgun. Kórónuveiran lifir ekki í matvælum og aflinn því nýtanlegur. Aðgerðir verða gerðar í samvinnu við sóttvarnaryfirvöld.