Nokkur ólga er í Facebook-hópnum „Jordan Peterson-klúbburinn“ vegna pistils sem birtist í Fréttablaðinu í dag og fjallar um sálfræðinginn kanadíska, sem flutti fyrirlestur fyrir fullu húsi í Háskólabíói á laugardaginn var.
Fyrirlesarinn og rithöfundurinn Jordan Peterson er sálfræðingur að mennt og starfaði sem prófessor í sálfræði við Háskólann í Toronto. Skoðanir hans og málflutningur hafa verið umdeild í gegnum tíðina. Hann á sér dyggan aðdáendahóp en sömuleiðis andstæðinga sem hafa gagnrýnt orðræðu hans harkalega.
Á sunnudag birtist viðtal í Íslandi í dag sem Snorri Másson tók við Jordan Peterson. Í viðtalinu átti Peterson frumkvæði að umræðu um málefni transfólks, en hann sagði meðal annars að heilbrigðisstarfsfólk limlesti börn með skurðaðgerðum. Hann sagðist einnig vilja banna aðgerðir á transbörnum undir 18 ára aldri og gera þeim lagalega kleift að lögsækja heilbrigðisstarfsfólk sem framkvæmi á þeim slíkar aðgerðir.
Eftir viðtalið við Peterson áréttaði Snorri að sárasjaldgæft væri að þær kynleiðréttingaraðgerðir sem hann vísaði til væru framkvæmdar á einstaklingum yngri en 18 ára í heiminum. Samkvæmt heimildum fréttastofu Stöðvar 2 hefðu engar slíkar aðgerðir verið framkvæmdar á einstaklingi yngri en 18 ára á Íslandi. Stundum væru kynhormónabælandi meðferðir notaðar til þess að styðja við trans ungmenni en löng reynsla væri komin á slíkar meðferðir.
Ummæli Peterson hafa vakið hörð viðbrögð innan transsamfélagsins á Íslandi.
„Trans fólk er til, trans börn eru til“
Í dag birtist skoðanapistill í Fréttablaðinu, svokallaðir bakþankar, þar sem Peterson og fyrirlestur hans eru umfjöllunarefnið.
Þar segir meðal annars:
„Þessi fyrirlestur var sömu helgi og leghafar vestanhafs misstu sjálfræði yfir eigin líkama, sem aðstoðarmaður ráðherra sagði rétta ákvörðun, í ljósi hans takmarkaða skilnings á bandarísku lagaumhverfi. Þetta gerði hann í staðinn fyrir að taka siðferðislega afstöðu.“ Höfundur vísar þar til Brynjas Níelssonar, aðstoðarmanns dómsmálaráðherra og pistils sem hann skrifaði nýverið á Facebook-síðu sína.
„Leghafar eiga að eiga algjört og ótvírætt vald yfir eigin líkama. Trans fólk er til, trans börn eru til – til allrar hamingju. Til andskotans með þau sem básúna annað.“
Óánægja meðal aðdáenda Peterson
Ef marka má skjáskot sem blaðamanni bárust, hefur skapast heit umræða í kringum pistilinn í íslenskum Facebook-hópi sem nefnist Jordan Peterson-klúbburinn og virðast margir ósáttir. Í upphafsfærslunni er pistlinum deilt og því velt upp hvers vegna Peterson mæti svo miklu hatri í íslenskum fjölmiðlum.
Davíð Sigurþórsson segist telja að hluti ástæðunnar fyrir hatri á Peterson, sem hann segir að mestu óígrundað, sé að hann standist ekki mátið að taka harkalega til orða „og fara einstaka sinnum yfir í að stuða bara til að stuða.“
Guðmundur Pálsson er ósammála. „Mér sýnist þó að hann taki sterkar til orða því hann sér vissa hluti skýrar nú en áður. Við sáum það margir áður en hann opnaði augun en hann hefur orðkynngi sem margir vilja hlusta á.“
Davíð svarar Guðmundi: „Ég er búinn að fylgjast með honum frá „upphafi“ og þessi ruddalega orðanotkun hefur bara aukist hjá honum og það er ekki séns að það sé óvart. Hann veit alveg hvað hann er að gera.“
Guðmundur vill tengja harkalega orðræðu Peterson við trú. „Hann er trúaður orðinn og því fylgir að sjá betur greinarmun góðs og ills. Það er greinarmunur sem var alls ekki til áður, en þegar hann þrýstir á er ekki lengur tilefni til diskusjóna um það sem augljóslega er rangt.“
Jón Hannes svarar upphafsinnlegginu og segir: „Það er svo reitt. Reiðin er svo sterk og réttlát, því JP varpar ljósi á botnlausa hræsni og vitleysu vinstrisins. Blaðamannastéttin og kennarastéttin er stútfull af þessum nýmarxísku rugludöllum.“
„Fjölmiðlar eru orðnir að óvinum fólksins. Svosem eðlilegt að þeir hegði sér svona miðað við það,“ segir Baldur Ingi.
Guðmundur Pálsson segir pistilinn sýna að fjölmiðlamenn séu í ólæknandi ástandi. „Það eina sem hrífur er að sniðganga fjölmiðlana með öllu, bæði fólk og fyrirtæki. Láta þá fara á hausinn.“
Blaðamaðurinn Jakob Bjarnar Grétarsson tjáir sig við færsluna og segir fólk verða að kunna að gera greinarmun á viðhorfspistlum og fréttaflutningi. „Nú kann það svo að vera að ritstjórnir þessa lands, og sumar þá meira en aðrar, ættu að fara í naflaskoðun hvað það varðar að viðvarandi rétttrúnaður sé farinn að brengla objectíva frásögn. Ég ætla ekki að skjóta loku fyrir það. En að taka pistil þessa labbakúts, sem þráir að vera Twitterhetja, þráir að teljast fyndinn en er það auðvitað ekki því það er ekkert til sem heitir pc-grín eðli máls samkvæmt, henda á loft og segja: Fjölmiðlar eru óvinir fólksins … ég er hræddur um að Jordan Peterson gæfi ekki mikið fyrir slíka röksemdafærslu.“
Í kjölfar ummæla Jakobs Bjarnars ákveða fleiri að hjóla í pistlahöfundinn, Stefán Ingvar Vigfússon, en hann er sviðshöfundur, pistlahöfundur og grínisti. Magnús Þór grípur orð Jakobs Bjarnars þar sem hann kallar pistlahöfundinn „labbakút“ á lofti. „Þessi labbakútur var einmitt að skammast í fólki á brandara síðu um daginn. Hann tók það nefnilega að sér blessuð sálin að upplýsa heimskan almúgann hvað væri fyndið, hann er nefnilega „atvinnu grínisti“ og veit hvað hann syngur.“
Jakob Bjarnar svarar þá Magnúsi og heldur áfram að beina sjónum að persónu pistlahöfundar og starfi hans: „Ég hef varla vitað ófyndnari mann og það liggur við að maður finni til með woke-hjörðinni sem telur sér auðvitað skylt að kreista uppúr sér hlátur þegar hann tekur til máls. Átakanlegt.“
Fjölmiðlamaðurinn Frosti Logason leggur líka orð í belg í athugasemd við færsluna: „Þessi hefur mikið verið að taka að sér hlutverk hins grjótharða netníðings á Twitter undanfarið. Hans sérgrein þar eru útúrsnúningar rétt eins og í þessum pistli. Hann á mikið ólært.“
Þess má geta að Stefán Ingvar er hluti af uppistandshópnum VHS, en sýningar þeirra hafa vakið lukku og verið vel sóttar, þótt erfitt sé að finna tengingu pistils hans við þann feril.