Afstaða, félag fanga og annarra áhugamanna um bætt fangelsismál og betrun, afhenti Reykjavíkurborg 50 nýjar dýnur sem verða notaðar í neyðarskýlum og úrræðum í borginni en þetta kemur fram í tilkynningu frá félaginu. Heiða Björg Hilmarsdóttir, formaður velferðarráðs Reykjavíkurborgar, tók við dýnunum í ráðhúsi Reykjavíkur.
„Um er að ræða 50 sérhannaðar dýnur, af tegund sem meðal annars eru notaðar á sjúkrahúsum, Dýnurnar eru því sérlega vel fallnar til notkunar á fyrrnefndum stöðum, þar sem skjólstæðingar Reykjavíkurborgar gista. Afstaða sinnir mörgum einstaklingum sem glíma við heimilisleysi, vímuefnaraskanir og önnur félagsleg vandamál og er alltaf einhver hluti þeirra í úrræðum Reykjavíkurborgar.
Sérstakar þakkir fyrir aðstoðina fær Landspítalinn og Sigurður Reynisson (SÖR), en án þeirra hefði þetta ekki orðið að veruleika.“
Ljóst er að þessar dýnur munu koma að miklu gagni fyrir marga á næstunni.
„Það er með mikilli ánægju og hlýhug sem Afstaða afhendir Reykjavíkurborg dýnurnar, nú þegar kuldinn og myrkrið er sem mest – en líka þegar hátíð ljóss og friðar gengur í garð.“
