Egill Helgason segir frá einelti sem hann varð fyrir í æsku, í nýrri Facebook-færslu.
Einelti hefur lengi verið þjóðarböl, eða jafnvel mannkynsböl en Egill Helgason rifjar upp það sem hann varð fyrir í æsku, þó hann nefni aldrei orðið einelti, í Facebook-færslu. „Þegar ég var strákur var ég stundum kallaður Skalli. Þetta fór óskaplega í taugarnar á mér. Vinir mínir notuðu ekki þetta nafn en það var þekkt meðal kunningja og skólafélaga.“ Svona byrjar færsla Egils en segir ástæðuna fyrir viðurnefninu vera þá staðreynd að hann hafi verið rauðhærður. „Jú – þetta er stytting úr Rauðskalli Brennivínsson,“ skrifaði Egill en Jón Gnarr, fyrrverandi borgarstjóri Reykjavíkur og grínisti, opnaði sig fyrir nokkrum árum um sára reynslu sína er hann varð fyrir einelti í grunnskóla og meðal annars einmitt uppnefndur Rauðskalli Brennivínsson.
Egill hélt áfram: „En í morgun hitti ég gamlan nágranna minn úr Vesturbænum, mann sem er á svipuðu reki og ég, rauðhærðan. Hann sagði mér að hann hefði verið kallaður Rauðskalli Brennivínsson. Einmitt. Þetta var semsagt algengt uppnefni á rauðhærðum strákum í þá tíð – og hjá mér var það stytt í hið hvimleiða viðurnefni Skalli. En af hverju Brennivínsson?“