Alvarlegt vélsleðaslys varð við Langjökul stutt eftir klukkan 14 í dag en þyrla Landhelgisgæslunnar var við æfingu nálægt jöklinum og brást skjótt við.
Samkvæmt frétt RÚV flutti þyrla Gæslunnar tvær bandarískar konur á Landspítalann í Fossvogi rúmlega 14 í dag en þær höfðu lent í vélsleðaslysi við Langjökul.
Þyrslusveit Gæslunnar brást skjótt við útkallinu en hún var við æfingar í nálægð við jökulinn. Náðist því að flytja konurnar á spítalann innan við klukkutíma eftir að útkallið barst.
RÚV hefur eftir Ásgeiri Erlendssyni, upplýsingafulltrúa Landhelgisgæslunnar, að konurnar tvær séu bandarískir ferðamenn en önnur þeirra er meira slösuð en hin og eru meiðslin talin alvarleg.
Ekki er hægt að gefa frekari upplýsingar um alvarleika málsins eins og er.