Anna Kristjáns vill forðast Sjálfstæðisflokkinn: „Aldrei migið í saltan sjó“

Anna Kristjánsdóttir, fyrrum sjómaður, gerir slagsmál Hermanns Nökkva Gunnarssonar, framkvæmdastjóra SUS og blaðamanns Morgunblaðsins, og Þorleifs Ingólfssonar að umtalsefni í nýjum pistli sem hún birti fyrr í dag en þeir slógust um helgina vegna þess að þeir studdu ekki sömu frambjóðendur í formannskjöri Sjálfstæðisflokksins.

Í frétt sem Vísir skrifaði um þessi blóðugu átök er sagt að þeir hafi heilsast að sjómannasið. Anna kannast ekki við slíkt úr sinni sjómennskutíð.

„Tveir landsfundarfulltrúar á landsfundi Sjálfstæðisflokksins um síðustu helgi voru að deila og kjaftshögg dundu og þetta var kallað að heilsast að sjómannasið. Ég var til sjós í mörg ár og heilsaði fjölda fólks meðan á sjómennsku minni stóð, sumum með handabandi, en öðrum með faðmlögum og jafnvel kossi, en þrátt fyrir margra ára sjómennsku man ég aldrei eftir því að sjómenn heilsuðust með því að gefa hvor öðrum á kjaftinn,“ skrifar Anna um málið.

„Vissulega hefi ég aldrei verið meðlimur í Sjálfstæðisflokknum og mun aldrei verða, en miðað við þetta ofbeldisfulla tal er full ástæða til að forðast Sjálfstæðisflokkinn í lengstu lög. Ég veit svosem að fyrrum alþingismaður fyrir Sjálfstæðisflokkinn sem nú er nýlega látinn notaði þetta orðalag þegar deilt var um sjálfvirkan sleppibúnað björgunarbáta, en ég man ekki hvort hann notaði þessa umrædda kveðju í reynd er hann ræddi við þá sem voru með aðrar aðferðir við sjálfvirkan sleppibúnað. Að auki grunar mig að umræddir landsfundarfulltrúar Sjálfstæðisflokksins hafi aldrei migið í saltan sjó. Þess meiri er skömm þeirra.“