Leikkonan Arna Magnea Danks hefur vakið mikla athygli á undanförnum árum fyrir baráttu sína fyrir réttindum trans fólks en vegferð hennar hefur verið fullt af erfiðleikum. Arna fæddist árið 1970 í líkama drengs en áttaði sig fljótt á því að hún væri í raun kona. Í viðtali við mbl.is ræðir Arna meðal annars fordóma lögreglumanna í Bretlandi eftir að henni var nauðgað og trans ferlið sem hún gekk í gegnum.
„Ég var búin að vera hjá sálfræðingi, af og til, frá árinu 2012 til að vinna úr áfallastreitunni og það var hann sem hjálpaði mér að horfast í augu við sjálfa mig. Eftir það gekk þetta tiltölulega hratt fyrir sig, ég byrjaði á hormónum vorið 2018 og komst í leiðréttingaraðgerð tæpum tveimur árum seinna. Aðgerðin var framkvæmd á Íslandi en það komu strax upp mikil vandamál, miklir verkir fylgdu sem og blæðingar. Sá sem skar mig upp var verktaki og var eftirfylgnin því varla nokkur. Eftir átta daga í helvíti fékk ég skoðun og þá kom í ljós að ég var komin með drep inni í leggöngunum og væri mjög hætt komin. Það þurfti að skafa allt út og loka leggöngunum. Þetta var stöðug barátta, bæði andleg og líkamleg, næstu mánuði á eftir. Ég fékk sortuæxli í eyrað árið 2022 og skurðlæknirinn, sem fjarlægði það, bauðst til að hjálpa mér. Með hans hjálp fann ég sérfræðing og gekkst undir aðgerð sem kallast Peritoneal pull-through. Sú aðgerð hafði aldrei verið framkvæmd í Evrópu, ég er fyrsta og eina konan í Evrópu sem hef gengist undir þessa aðgerð,“ sagði Arna í viðtalinu.
Mætti fordómum hjá lögreglu
Arna segir einnig frá því að þegar hún bjó í Bretlandi hafi henni verið nauðgað af fyrrverandi samstarfsmanni sem fékk að gista í íbúð hennar eftir veislu. Arna reyndi að kæra málið hjá lögreglunni en mætti miklum fordómum. „There’s no point for people like you to press charges, you’re always on your knees anyways,“ hefur Arna eftir lögreglumanni í Bretlandi.
Þá leikur Arna aðalhlutverkið í myndinni Ljósvíkingar sem kemur í kvikmyndahús í september en hún er eina leiklistalærða trans konan á Íslandi. Myndin fjallar um æskuvinina Hjalta og Björn sem reka fiskveitingastað í sínum heimabæ yfir sumartímann. Þá dreymir um að geta haft opið allt árið um kring og þegar óvænt tækifæri þess efnis bankar upp á, tilkynnir Björn vini sínum að hún sé trans kona og muni framvegis heita Birna.