- Auglýsing -
Árni Gunnarsson, fyrrverandi alþingismaður og blaðamaður, er látinn. Hann var 82 ára að aldri. Mbl.is greinir frá því að hann hafi látist aðfaranótt föstudags.
Árni var kjörinn alþingismaður Norðurlands eystra árið 1978 og sat á þingi fyrir Alþýðuflokkinn með hléum til ársins 1991. Hann var forseti neðri deildar árin 1979 og svo frá 1989 til 1991.
Áður en hann tók sæti á þingi starfaði hann sem blaðamaður við Alþýðublaðið. Þar var hann fréttastjóri árin 1959 til 1965. Eftir það var hann fréttamaður og fréttastjóri á RÚV og Vísi frá 1965 til 1976.
Einn af hápunktum ferilsins hans þar hlýtur að hafa verið þegar eldgos hófst í Heimaey árið 1973. Árni var fréttamaður Ríkisútvarpsins á vettvangi og skrifaði hann síðar bókina Eldgos í Eyjum.