Fólk er að keyra of hratt framhjá grunnskólum á höfuðborgarsvæðinu, samkvæmt lögreglunni.
Lögreglan hefur þessa dagana verið við umferðaeftirlit við grunnskóla á höfuðborgarsvæðinu, nú þegar skólarnir eru byrjaðir aftur eftir sumarfrí. Segir lögreglan að óhætt sé að segja að ástandið sé ekki nógu gott. Hafa hraðamælingar það sem af er vikunni sýnt að brotahlutfalið í og við grunnskólana er hátt og þykir full ástæða til að minna ökumenn á að aka hægar og sýna meiri tillitssemi.
Í tölvupósti sem barst frá lögreglunni kemur fram að nefna megi af einstökum hraðamælingum, að meirihluti ökumanna hafi ekið of hratt hjá Fellaskóla, í Breiðholtinu en þar var brotahlutfallið 51 prósent. Við þrjá aðra skóla ók um þriðjungur ökumanna og ríflega það, of hratt. Skólarnir eru Setbergsskóli en þar var hlutfallið 36 prósent, Vogaskóli en þar var brotahlutfallið 35 prósent og Lágafellsskóli, með 32 prósent brotahlutfall. Um fimmtungur ökumanna eða 21 prósent, ók svo of geyst við Melaskóla, en á eina staðnum þar sem ástandið virtist nálægt því að vera í lagi var við Árbæjarskóla en þar er brotahlutfall ökumanna fimm prósent.
Alls voru 240 ökumenn nappaðir við hraðakstur við áðurnefndar hraðamælingar en fjórir þeirra eiga aukreitis yfir höfði sér sviptingu ökuréttinda vegna hraðakstursins. Tveir þeirra mældust á 71 kílómetra hraða en í öllum tilfellum var um að ræða götur þar sem hámarkshraði er 30.
Segir lögreglan að ekki sé ástæða til að ætla að ástandið sé eitthvað skárra við aðra grunnskóla í umdæminu og vill hún því ítreka við ökumenn, enn og aftur, að þeir aki varlega, ekki síst í námunda við skóla enda séu þar margir á ferli, þar á meðal nýir vegfarendur sem eru að hefja skólagöngu.