Stefán Einar Stefánsson kampavínsinnflytjandi og fyrrverandi fréttastjóri viðskipta hjá Morgunblaðinu, hefur skrifað stórar vörukynningar í síðustu tveimur Viðskiptamoggum. Varan sem hann hefur verið að kynna er kampavín sem hann flytur sjálfur inn.
DV fjallar um málið í flokknum Orðið á götunni, en þar er Stefán Einar kallaður lífsnautnasérfræðingur Morgunblaðsins og Viðskiptamoggans. Vörukynningarnar, sem ekki eru merktar sérstaklega sem slíkar, eru báðar um freyðivín sem fyrirtæki Stefáns Einars, Kampavínsfjelagið og Co. ehf. flytur inn. Pistillinn er undir nafninu Hið ljúfa líf en annar þeirra er segist Stefán skrifa beint frá Champagne-héraði í Frakklandi en undir nafni höfundar í seinni pistlinum má sjá tölvupóstfang Stefáns hjá mbl.is og má því með réttu titla hann sem blaðamann Morgunblaðsins. Í pistlunum mærir blaðamaðurinn vínið sitt í hástert og segir meðal annars: „Það var hátíðlegt að dreypa á þessu frábæra víni sem sannarlega er við aldur en frísklegt um leið. Karamellukenndir tónarnir vitna um tímans þunga nið en frískleg sýran um gæði framleiðslunnar og þá möguleika sem vandað kampavín hefur til þess að geymast lengi og batna með árunum.“
Höfundur Orðið á götunni pistilsins bendir á að ársreikningur frá kampavínsfélagi Stefáns hafi ekki enn verið birtur en hæðist svo að honum í næstu orðum: „Ekki kom fram í reikningnum fyrir 2021 hvort ókeypis kynningar í Viðskiptamogganum hafi verið færðar til tekna á því ári en án efa verður svo í ár því vart fer strangheiðarlegur viðskiptasiðfræðingurinn, lífsnautnasérfræðingurinn, blaðamaðurinn og freyðivínsinnflytjandinn Stefán Einar að snuða keisarann um það sem keisarans er.“ Hann heldur áfram: „Óneitanlega hlýtur það samt að vera góð búbót fyrir víninnflytjandann Stefán Einar að geta nýtt sér tengslin við blaðamanninn Stefán Einar og fengið birtar áfengiskynningar og -auglýsingar á besta stað í eina dagblaði landsins jafnvel þótt fáir lesi það. Og það þótt áfengisauglýsingar séu bannaðar.“
Mögulega hefur Viðskiptamogginn með þessum vörukynningum brotið áfengislögin en í 20. gr. laganna stendur: Hvers konar auglýsingar á áfengi og einstökum áfengistegundum eru bannaðar. Enn fremur er bannað að sýna neyslu eða hvers konar aðra meðferð áfengis í auglýsingum eða upplýsingum um annars konar vöru eða þjónustu.
Með auglýsingu er átt við hvers konar tilkynningar til almennings vegna markaðssetningar þar sem sýndar eru í máli eða myndum áfengistegundir eða atriði tengd áfengisneyslu, svo sem áfengisvöruheiti eða auðkenni, eftirlíkingar af áfengisvarningi, spjöld eða annar svipaður búnaður, útstillingar, dreifing prentaðs máls og vörusýnishorna og þess háttar.
Bannið tekur með sama hætti til auglýsinga sem eingöngu fela í sér firmanafn og/eða firmamerki áfengisframleiðanda. Þó er framleiðanda sem auk áfengis framleiðir aðrar drykkjarvörur heimilt að nota firmanafn eða merki í tengslum við auglýsingu þeirra drykkja, enda megi augljóst vera að um óáfenga drykki sé að ræða í skilningi laganna og ekki vísað til hinnar áfengu framleiðslu.