Viðbúnaðarstig lögreglu vegna hryðjuverkaógnar hefur verið hækkað eftir ákvörðun Landsréttar að sleppa tveimur mönnum sem grunaðir eru um skipulagningu hryðjuverka, úr haldi.
Viðbúnaðarstigið var hækkað úr A í B, stig B felur í sér að vísbendingar séu um öryggisógnir. Ekki sé þó þörf á sérstökum lögregluaðgerðum. Lögreglan verður með aukið eftirlit á þeim stöðum sem talið er þörf fyrir að vakta.
Þetta kemur fram í fréttatilkynningu lögreglu, Vísir greindi fyrst frá. Einnig segir frá því að breytingar hafi verið gerðar á hættustigum í tengslum við hryðjuverk og sé verklag íslensku lögreglunnar í samræmi við það sem þekkist hjá öðrum þjóðum.
Hættustigin eru nú fimm: Lágmarks ógn, takmörkuð ógn, aukin ógn, akvarleg ógn og mjög alvarleg ógn. Ísland er talið vera á þriðja stigi og sé hér aukin ógn á hryðjuverkum.