Hætt hefur verið við hækkun á gjaldskrá Matvælastofnunar.
Oddný Anna Björnsdóttir, Framkvæmdastjóri Samtaka smáframleiðanda matvæla og Beint frá býli, segir það gleðitíðindi að Svandís Svavarsdóttir, matvælaráðherra, hafi hlustað á smáframleiðendur og hætt við að hækka gjaldskrá Matvælastofnunar.
„Þetta var að sjálfsögðu mikill léttir enda má landbúnaðurinn og þá sérstaklega smáframleiðendur og Beint frá býli bændur ekki við meiri kostnaðarhækkunum en hafa verið undanfarið. Þetta gefur okkur meiri fyrirsjáanleika inn í sláturtíð, við vissum náttúrulega ekkert hvaða áhrif þetta myndi hafa á heimtökugjald og annað en við bara vonumst til að þar sem að þetta er að svo stöddu; að ráðherra hefji vinnu með Matvælastofnun við að innleiða meira rafrænt eftirlit,“ sagði Oddný í samtali við RÚV um málið og sagði að kostnaður við eftirlit sé mikill því að dýralæknir þurfi að samþykkja slátrun á öllum dýrum. Þá séu Samtökin tilbúin að hjálpa til við að einfalda eftirlit.
„Þar sem bændur eru sjálfir að slátra sínu fé, maður getur nú ekki séð fyrir sér að bóndi myndi slátra sjúkri skepnu og selja hana með, eins og maður segir, andliti sínu á pakkanum. Ekki standa dýralæknar í fiskvinnslum og skoða hvern einasta fisk.“