Sverrir Einar Eiríksson, eigandi skemmtistaðanna Exit og b5 og hótelrekandi Hótel Brim við Skipholt, vill hafa hendur í hári tveggja manna sem reyndu að kveikja í hótelinu á dögunum. Birti hann myndband af verknaðinum og heitir 100.000 krónum í fundarlaun.
Sverrir Einar skrifaði færslu í morgun á Facebook þar sem hann birtir myndskeið sem sýnir tvo aðila brjóta rúðu á Hótel Brim í Skipholtinu en Sverrir rekur það. Eftir að þeir brjóta rúðun kasta þeir bensínsprengjum inn og kveikja í. Skaðinn var lítill en Sverrir heitir 100.000 krónum í fundarlaun ef einhver getur bent honum á aðilana. Færsluna má lesa hér:
„Sunnudaginn 14 janúar kl 7:14 þá mættu þessir aðilar í Skipholt 27, 105 Reykjavík og sáu ástæðu til þess að mölva rúðu og reyna að kveikja í. Sem betur fer varð lítill skaði, brotin rúða og smá brunablettur á bók.
Ég óska eftir upplýsingum um hvaða aðilar voru að verki, 100.000 kr fundarlaun í boði fyrir þá sem getur með óyggjandi hætti bent mér á báða aðilana.“
Yfirlýsing frá Sverri birtist svo á DV en þar segir hann málið tengjast „strákagengi“ sem hefðu lent í deilum við dyraverði hjá fyrirtæki sem þjónustar skemmtistaða hans. Yfirlýsinguna má lesa hér og neðst í fréttinni má sjá myndskeiðið.
„Ég leitaði til lögreglu vegna skemmdarverka og hótana frá einhverju strákagengi sem komist hafði upp á kant við dyraverði hjá fyrirtæki sem leigir út dyravörslu til skemmtistaða fyrir um hálfum mánuði. Strákarnir eru ekki klárari en svo að þeir hafa beint reiði sinni að mér. Síðan þetta gerðist hef ég látið af viðskiptum við þetta dyravarðafyrirtæki og hafði vonast til þess að laganna verðir myndu bregðast skjótt við til að tryggja öryggi fólks gegn þessum drengjum sem í fávisku sinni virðast til alls vísir. Eftirgrennslan lögreglu hefur hins vegar engu skilað og ekki að sjá að rannsókn málsins gangi nokkuð. Þess vegna ákvað ég að birta sjálfur þetta myndband í von um að hafa uppi á þessum pörupiltum. Á myndbandinu sést tilraun til íkveikju á hóteli sem ég rek sem gerð var núna á sunnudagsmorguninn. Þetta er að sjálfsögðu stóralvarlegur glæpur. Betur fór en á horfðist og skaði sem betur fer lítill. Til að tryggja eigið öryggi og viðskiptavina minn hef ég líka ráðið öryggisfyrirtæki til að sinna gæslu og finna þessa drengi til að tryggja að svona lagað endurtaki sig ekki.“