Lögreglan á Suðurlandi bar nú í janúar kennsl á höfuðkúpu sem fannst haustið 1994 við Ölfusá. Um er að ræða höfuðkúpu Jóns Ólafssonar sem fæddur var 8. júlí 1940 og er talinn hafa fallið í Sogið á aðfangadag 1987.
Börnum Jóns hefur verið kynnt þessi niðurstaða og munu þau fá jarðneskar leyfar föður síns á allra næstu dögum.
Jón átti tvö börn, Birgittu sem fædd er árið 1967 og Jón Tryggva sem fæddur er árið 1972.
Birgitta er fyrrum þingmaður Pírata í Reykjavík og hefur tjáð sig um föðurmissinn, meðal annars í fyrirlestri sem hún hélt á Ted Talk árið 2015
Birgitta hefur nú birt færslu á Facebook þar sem hún tjáir sig um málið.
„Elsku kæri pabbi minn: loksins, friðurinn fundin,“ skrifar hún meðal annars.
Hún segir systkinin vera óendanlega þakklát yfirlögregluþjóni Suðurlands fyrir að fylgja málinu eftir alla leið. „Svo að loks sé hægt að jarðsetja pabba og vera fullviss um afdrif hans.“
Sjá einnig: Jón hvarf á aðfangadag 1987: Kennsl borin á höfuðkúpu með DNA rannsókn