Færsla í Facebook hópnum Fjörðurinn minn Eskifjörður hefur vakið mikinn óhug en þar má sjá fimm dauð ungviði sem taldar eru líkur á að séu kettlingar. Höfundur færslunnar segir börnin sín hafa fundið dýrin í á inni í miðjum bænum. „Kæri viðkomandi sem þetta gerði, þetta finnst mér afskaplega leiðinlegt og sóðalegt að börnin mín og annara finni hér í á inní miðjum bæ. Værir þú til í að koma svona fyrir annarstaðar en að henda þessu bara í ánna.“
Athugasemdir við færsluna benda á að kettlingarnir hafi fundist í poka en það hefur ekki verið staðfest. Allir eru þó sammála því að ef hörmungin hefur orðið að mannavöldum, sé um hreina illsku að ræða. Samkvæmd lögum um velferð gæludýra er með öllu óheimilt að aflífa gæludýr, að undanskildum dýralæknum. „Dýralæknum er einum heimilt að aflífa gæludýr, nema í neyðartilfellum þegar fullreynt er að ekki næst í dýralækni og ætla má að sjúkdómur dýrs eða meiðsl valdi dýrinu óbærilegum kvölum eða séu banvæn.“ Brot á lögum um dýravernd geta varðað mann fangelsi allt að einu ári.
