„Það var ekkert sem kom upp. Ég ákvað að taka þessa ákvörðun, ég hafði ekki áhuga á að vera lengur fulla frænkan,“ sagði Brynja Nordquist í þættinum Segðu mér með Viktoríu Hermannsdóttur á Rás 1 þegar hún var spurð hvers vegna hún hefði ákveðið að hætta að drekka fyrir fimm árum.
Spurð hvort það hafi verið erfitt segir hún ákveðið nei, en bætir við að auðvitað hafi komið stundir þar sem hana hafi langað í áfengi en hún hafi ekki viljað skemma árangurinn af edrúmennskunni.
„Manni langar ekki að skemma það sem maður er búin að byggja upp í sér,“ segir Brynja í þættinum. „Mér líður bara betur svona. Ég fæ ekki þennan kvíða. Ég fékk oft kvíða eftir eitthvað helgarstuð eða eitthvað þess háttar og hugsaði: „Ég nenni ekki að gera þetta núna, geri þetta bara á morgun þegar þreytan er farin úr manni og eitthvað,“ segir Brynja sem finnur mun á líðan sinni eftir að hún hætti að neyta áfengis.
„Mér bara líður miklu betur. Mér finnst þetta bara miklu skemmtilegra, ég man allt. En ég er nú reyndar orðin svolítið gleymin en þá hefði vínið ekkert verið betra. Ég er mjög þakklát fyrir að hafa tekið þessa ákvörðun.“
Í þættinum ræðir Brynja jafnframt fyrirsætuferilinn og flugfreyjustarfið, en hún hætti að fljúga fyrir tveimur árum.
Þáttinn í heild má hlusta á í spilara RÚV og öllum helstu hlaðvarpsveitum.