Brynjar Níelsson varaþingmaður skrifar í kvöld angurværa stöðufærslu á Facebook þar sem hann segist varla geta hugsað sér líf án Gísla Marteins og hans Viku. Brynjar er ekki þekktur fyrir að vera mikil tilfinningavera og háðið því augljóst. Vikan með Gísla Marteini er vafalaust umdeildasti þáttur Íslands í dag. Sitt sýnist hverjum en óþol gagnvart Gísla er þó hávært.
Brynjar virðist til að mynda sakna þess að kvarta undan þættinum. „ Sumrin eru erfiðasti tími ársins fyrir mig. Mér leiðist þegar Vikan með Gísla Marteini er ekki á dagskrá sjónvarpsins. Ég sakna hlátursins og viðtalanna við sama fólkið aftur og aftur svo ég tali nú ekki um alla góðu brandarana um Ása Friðriks og mig. Læknirinn minn sagði að það væri mikill munur á heilsu þjóðarinnar þegar þáttunum lyki á vorin,“ segir Brynjar og heldur áfram:
„En hann sagði að það sem raunverulega hrjáði mig væri athyglisbrestur án ofvirkni. Ég myndi ekki eftir fólki sem ég hefði oft hitt og engin nöfn. Þess vegna verði samtöl mín við annað fólk mjög vandræðaleg, jafnvel við náfrænkur og frændur. Ég væri ekki bara líkur Brad Pitt í útliti heldur glímdi ég við sama vanda og hann.“