Brynjar Níelsson, varaþingmaður og aðstoðarmaður ráðherra, hjólar í Stefán Ingvar Vigfússon fyrir að gagnrýna Jordan Peterson, kanadískan áhrifavald. Stefán gagnrýndi að vísu líka Brynjar, sem kann að skýra viðbrögð Brynjars. Nánar má lesa um pistil Stefáns og viðbrögð við honum hér.
Brynjar segir á Facebook að Stefán sé ekki í jafnvægi. „Hinn geðþekki uppistandari, Stefán Ingvar Vigfússon, var með uppistand í Bakþönkum Fréttablaðsins í morgun. Hann áttar sig ekki á því, frekar en Kristinn Hrafnsson, að það fer aldrei vel að vera með uppistand þegar menn eru í fullkomnu ójafnvægi. Þá fer allt fyrir ofan garð og neðan,“ segir Brynjar.
Brynjar heldu áfram og reynir að tengja Stefán við Sovétríkin. Stefán fæddist tveimur árum eftir að þau féllu. „Stefáni finnst, eins og flestum vinstri mönnum, að þeir sem eru ósammála þeim séu hættulegir menn. Þeir eiga því að fara til andskotans. Þetta hljómar kunnuglega í eyrum þeirra sem muna tímanna tvenna. Nú um stundir er kanadískur prófessor, Jordan Peterson að nafni, hættulegasti maður sem fyrirfinnst. Afskaplega rökfastur maður sem bendir oftast á það augljósa og þær hættur sem vestrænu lýðræði stafar af pólitísku ofstæki og rétthugsun. Næst hættulegasti maðurinn er miðaldra karl á fésbókinni, sem er aðstoðarmaður ráðherra og engu ræður. Hann fengi ekki Trabant ef Stefán Ingvar fengi einhverju ráðið. Og þyrfti örugglega að sæta geðrannsókn að auki.“