Brynjar Níelsson, aðstoðarmaður ráðherra, hælir Pírötum á Facebook fyrir að vilja lögleiða klám á Íslandi. Hann gengur enn lengra, vafalaust spóskur, og kallar eftir neyslurými fyrir klámfíkla. Brynjar skrifar:
„Þeir mega eiga það vinir mínir í Pírötum að þeir reyna að vera samkvæmir sjálfum sér þegar kemur að því að hjálpa fíklum. Nú er bjartara framundan hjá klámfíklum því Píratar hafa lagt fram frumvarp um að afglæpavæða klámið. Við leysum ekki vanda klámfíkla með refsingum. Mér finnst skrítið að ekki hafi verið neyslurými fyrir klámfíkla á kostnað skattgreiðenda eins og fyrir aðra fíkla.“
Hann leggur til að Píratar reyni næst að lögleiða vændi. „Eðlilegt framhald hjá Pírötum væri að leggja til afglæpavæðingu kynlífsviðskipta fullráða fólks. Það hlýtur að vera mikill stuðningur við það á þinginu þar sem þingmenn hafa undanfarin misseri verið uppteknir af því að allir ráði yfir líkama sínum, sama hvað á bjátar. Að stunda kynlífsviðskipti hlýtur því að vera sömu mannréttindin og að neyta bráðdrepandi fíkniefna svo dæmi sé tekið. Að auki myndi draga verulega úr álagi á undirmannaðri lögreglu að losna við að elta fullráða einstaklinga upp í svefnherbergi til að athuga hvort fé fari á milli þeirra,“ segir Brynjar.
„Að hæla Pírötum er hluti af jákvæðnimeðferðinni sem ég sæti nú um stundir. Öfugt við flestar aðrar meðferðir er kostnaður við hana greiddur úr eigin vasa.“