Bubbi Morthens tjáði sig í gær um mál Ingó veðurguðs gegn Sindra Þór Sigríðarsyni. Í færslu sinni á Facebook segir hann: „Þetta er með ólíkindum. Ef orðrómur er nóg þá er fokið í öll skjól.“
Aðalmeðferð í málinu fór fram í Héraðsdómi Reykjavíkur í gær en Ingó stefndi Sindra vegna nokkurra ummæla sem hann lét falla á netinu í fyrrasumar. Sagði hann meðal annars að Ingólfur „væri þekktur fyrir að ríða börnum“ en Ingólfur hefur þvertekið fyrir allar slíkar ásakanir.
Blaðamaðurinn Jakob Bjarnar Grétarsson sagði málið í raun vera skrípaleik og varpaði hann þeirri spurningu fram á Facebook hvers vegna rétturinn lætur draga sig niður á þetta plan.
„Ég er enginn sérstakur talsmaður Ingós, bara alls ekki; en hann sakar Sindra Twitterhetju um að hafa sett opinberlega fram meiðyrði um sig. Atriði sem Ingó hefur hvorki verið kærður, hvað þá sakfelldur fyrir. Og það hafi valdið sér tjóni. Og málsvörn Sindra er sú að hann hafi nú heyrt hitt og þetta um Ingó?! Og svo er dregin fram í vitnaleiðslur strollan úr Twitterríinu sem segjast líka hafa heyrt eitt og annað um manninn. Annað hvort eru þetta meiðyrði eða ekki. Og það hvort um Ingó hafi verið kjaftað eða ekki kemur því í sjálfu sér ekki við,“ sagði Jakob í færslu sinni sem vakti töluverð viðbrögð.