Bylgja Guðrún Brynjólfsdóttir segir að allir sem eru með lélegt ónæmiskerfi ættu að halda sig fjarri tjaldsvæðinu á Akureyri, Grímsnesinu og Hömrum. Hún birtir sláandi myndir af sjálfri sér í Facebook-hópnum Lúsmý á Íslandi. Ljóst er að Bylgja var illa leikinn eftir þessi illvígu kvikindi eftir dvöl á tjaldsvæðinu.
Bylgja segir ekki þverfótað fyrir lúsmý á Grímsnesinu. „Þið sem eruð með léleg ónæmiskerfi – ég vil vara ykkur við því að fara í Grímsnesið og á Hamra (tjaldsvæðið á Akureyri). Það er allt morandi í lúsmýi þar. Þið gætuð fengið svæsin ofnæmisviðbrögð við bitunum sem erfitt er að meðhöndla og mjög lengi að fara Ég veit að þetta getur verið einstaklingsbundið, en mig langaði bara til að vara við þessu,“ segir Bylgja.
Allt virðist því benda til þess að plágan agnarsmá sé að ná fótfestu um land allt. Fundarstaður lúsmý var lengst af bundinn við suðvesturhorn landsins.
Bylgja segist ekki hafa náð sér að fullu fyrr en hún fékk sýklalyf. „Það dugði ekkert minna en Dermovat krem á mig, Atarax lyfið og þetta hvarf ekki fullkomlega fyrr en ég fékk sýklalyf. Svo þetta er ekkert djók!,“ segir Bylgja og bætir við að myndirnar séu frá því að ofnæmisviðbrögðin voru að byrja.
„Svo varð þetta eins og ein stór rauð hella allsstaðar um líkamann og bólgurnar létu mig líta út eins og fílamanninn.“
