Í síðustu viku var karlmaður dæmdur sekur fyrir héraðsdómstól Austurlands, um gróft og alvarlegt kynferðisbrot gagnvart ungri konu. Brotið framdi hann í jólaboði fyrirtækis í desember síðastliðnum. Maðurinn var dæmdur í tveggja ára fangelsi og þarf að greiða miskabætur.
Samkvæmt Austurfrétt kom konan grátandi og hrædd á sjúkrahúsið í Neskaupsstað aðfararnótt 16. desember í fyrra eftir að brotið hafði verið á henni fyrr um nóttina. Ókunnur erlendur aðili hafði brotið á henni inni á hótelherbergi Austanlands en hún vaknaði við að maðurinn var að hafa við hana kynferðismök en hún gat lítið gert til að stöðva manninn, sökum ölvunar og svefndrunga. Maðurinn hafði sáðlát í rúminu á meðan hún þóttist sofa.
Um leið og maðurinn lét sig hverfa fór konan inn á klósett hótelherbergisins og hringdi í vin sinn sem ráðlagði henni að hringja strax í lögreglu, sem hún gerði. Í framhaldi af því fór hún á sjúkrahús til skoðunar.
Ótrúverðugur framburður
Maðurinn, sem hefur aldrei áður komið við sögu lögreglu, neitaði sök í málinu en breytti framburði sínum talsvert á meðan rannsóknin stóð yfir. Þótti dómnum það mjög ótrúverðugt en framburður mannsins var í algjörri mótsögn við framburð konunnar.
Í dómsorði segir að það sé „mat dómsins að frásögn brotaþola hafi í öllum aðalatriðum, og þá í ljósi lýstra aðstæðna, verið einlæg, varfærin og trúverðug. […] Að ofangreindu virtu er að mati dómsins ekki varhugavert að leggja frásögn brotaþola til grundvallar um atvik máls í öllum aðalatriðum. […] Hefur ákærði enga haldbæra og trúverðuga skýringu gefið á hinum sýnilegu lífssýnum sem vísað hefur verið til í rannsóknargögnum lögreglu eða á rannsóknarniðurstöðunni. Hefur ákærði að mati dómsins verið ótrúverðugur í hinum breytta framburði sínum og að auki eru skýringar hans harla ósennilegar í ljósi sérfræðigagnanna.“
Vegna verulegrar tilfinningaröskunar og andlegs þjáningar vegna kynferðisbrotins, krafðist konan fjögurra milljóna króna miskabóta. Dómarinn taldi hins vegar að bætur upp á 2,2 milljónir dyggðu. Að auki þarf hinn dæmdi að greiða allan sakarkosnað, sem nam í heild sinni 5,2 milljónum króna.