„Jæja Dagur, nú ætla ég að ónáða þig á Twitter. Þarf að vera fyllilega sammála Fríðu Ísberg, þetta er að verða ansi þreytandi.“
Þetta skrifar leikarinn geðþekki Vilhelm Neto á Twitter og deilir skjáskoti af Facebook þar sem kvartað er undan því að ekkert pósthús né Vínbúð sé lengur miðsvæðis og þá sérstaklega í Vesturbænum. Skjáskotið má sjá hér fyrir neðan.
Þessu svarar borgarstjóri Dagur B. Eggertsson nú fyrir hádegi. Hann skrifar: „Takk Vilhelm Neto. – já, við erum að lifa samfélagsbreytingu. Og þurfum að ræða þetta. Ekki viss um að sama gildi um Póstinn og ÁTVR. Pósturinn er að loka pósthúsum en vill setja upp miklu fleiri móttöku og sendingarstaði í staðinn, sk Póstbox. Þjónustan verður mannlaus en nær.“
Hann heldur svo áfram: „Ég hef heyrt hugmyndir um að svona þjónusta verði nær alla staðar í auðveldu göngu og hjólafæri innan Reykjavíkur – sem er miklu þéttar en Pósthúsin voru. Kannski flott. En vegna margra fyrirtækja getur þetta orðið mjög víða – jafnvel of víða?
Þótt rekstur póstsins sé hjá ríkinu en ekki borginni getur borgin bæði leyft þessi box í stórum stíl eða beint þeim annað. Sum staðar erlendis taka litlar verslanir og sjoppur við sendingum og pökkum og geyma jafnvel farangur og afla tekna. Hvað viljum við í Reykjavík? Ræðum það.“