Réttarhöld fara nú fram yfir söngvaranum Aaroni Ísaki Berry í Héraðsdómi Reykjavíkur, vegna kynferðisbrota gegn þremur barnungum drengjum. Aðalmeðferð í málinu fór fram 2. og 3. febrúar og því er niðurstöðu að vænta fljótlega. DV greindi fyrst frá málinu í gær.
Dómur er almennt kveðinn upp innan fjögurra vikna frá aðalmeðferð en á vef DV segir að dómsuppsaga í málinu hafi frestast þegar kalla hafi þurft til tvö sérfræðivitni til viðbótar fyrir dóminn, sem gáfu skýrslu í fyrradag.
Aaron Ísak er fæddur árið 1998 og er því 24 ára gamall. Hann skaust fram á sjónarsviðið þegar hann keppti í forkeppni Eurovision hér á landi árið 2020 undir listamannsnafninu Kid Isak. Árið áður hafði hann sigrað Söngkeppni framhaldsskólanna.
Margvísleg brot
Aaron Ísak er ákærður fyrir að hafa brotið ítrekað kynferðislega gegn þremur drengjum frá hausti ársins 2019 til vors árið 2020. Tveir drengjanna voru tólf ára þegar brotin áttu sér stað en ekki er vitað um aldur þess þriðja eins og sakir standa.
Í DV segir að samskipti Aarons Ísaks við drengina hafi hafist þegar þeir sendu honum skilaboð á Instagram, eftir að hafa séð hann koma fram. Eru þeir sagðir hafa hrifist af söng hans og sviðsframkomu. Eftir það hafi Aaron byrjað að senda þeim kynferðisleg skilaboð og er áreitið sagt hafa verið nær daglegt. Hann er sagður hafa skrifast á við þá á grófum, kynferðislegum nótum, lýst kynlífsathöfnum og sent þeim óviðeigandi og kynferðislegar myndir. Einnig er hann sagður hafa reynt að fá drengina til kynferðislegra athafna gegn greiðslu.
Aaron Ísak er einnig ákærður fyrir að hafa reynt að hafa kynferðismök við tvo drengjanna þar sem hann kyssti annan þeirra á munninn. Drengurinn er sagður hafa brugðist við með því að ýta honum frá sér. Aaron Ísak er sagður hafa káfað á drengnum utanklæða, meðal annars á klofi hans og einnig hafi hann reynt að fá sama dreng og vin hans með sér niður í bílakjallara.
Einnig er um að ræða ásakanir um að Aaron Ísak hafi haft þónokkuð barnaníðsefni í fórum sínum; 10 myndskeið og 74 ljósmyndir.
Fór í skóla drengjanna eftir yfirheyrslur
Aaron Ísak er sömuleiðis sakaður um að hafa farið í skóla drengjanna eftir að yfirheyrsla hjá lögreglu fór fram. Þar hafi hann sótt að meintum þolendum og sakað þá um lygar gegn sér. Móðir eins drengjanna fékk í kjölfarið nálgunarbann á hann. Samkvæmt DV voru drengirnir allir mjög hræddir eftir að Aaron Ísak kom í skólann.
Líklega má gera ráð fyrir niðurstöðu dómsins í málinu á næstunni.