Dorrit Moussaieff birtir ljósmynd af sér með forseta Ísraels á Instagram.
Fyrrverandi forsetafrú Íslands, Dorrit Moussaieff er að minnsta kosti málkunnug Isaac Herzog, forseta Ísrael, ef marka má færslu hennar á Instagram fyrir tveimur dögum. Í færslunni birti Dorrit ljósmynd af sér við hlið Herzog, sem heldur um axlir Dorritar. Rachel nokkur skrifar athugasemd við færsluna og virðist síður en svo ánægð með hana. Þar skrifar hún, í íslenskri þýðingu: „Okkar aumkunarverði forseti … ótrúlegt,“ og lét svo fjöldi grátandi broskalla fylgja textanum.
Herzog hefur verið duglegur að halda uppi vörnum fyrir gengdarlausum árásum Ísraelshers á Gaza, sem kostað hefur yfir 25.000 manns lífið, þar af hafa um 10.000 börn verið drepin í árásunum. Í desember síðastliðnum hélt hann því fram að ef að Ísrael væri ekki til, væri næsta skotmark Hamas, Evrópa sjálf.
Dorrit, sem er ísraelsk, hefur áður gagnrýnt forsætisráðherra Ísraels, Benjamin Netanyahu en hún birti fyrir 14 vikum síðan ljósmynd af honum á Instagram, með blóðugt handafar á andlitinu. Ekki liggur fyrir álit hennar á Herzog.
Fréttin uppfærð: Í fyrstu birtist frétt þar sem Dorrit var sögð hafa kalla forsetann aumkunarverðan, en um leiðinlegan misskilning var um að ræða. Er Dorrit beðin velvirðingar á því.
Hér má sjá færsluna:
