Tanja Tómasdóttir, umboðsmaður og lögfræðingur, hefur verið ráðin sem framkvæmdastjóri Breiðabliks og tekur hún við starfinu af Eysteini Pétri Lárussyni en hann tekur við sömu stöðu hjá Knattspyrnusambandi Íslands.
Tanja hefur undanfarið ár unnið hjá TM Tryggingum og hún var fyrsta íslenska konan til að hljóta réttindi sem umboðsmaður knattspyrnumanna en hún afrekaði það árið 2014.
„Það er mikill fengur að hafa fengið Tönju til starfa fyrir félagið. Menntun hennar, metnaður og fjölbreytt reynsla mun nýtast félaginu vel en auk þess býr hún yfir öflugri samskiptahæfni sem gerir hana að kröftugum fulltrúa félagsins. Metnaður Tönju á íþróttastarfi er eftirtektarverður, hún var fyrst íslenskra kvenna til að afla sér réttinda sem umboðsmaður knattspyrnumanna, hún hefur stundað fræðiskrif um samspil íþrótta og lögfræði og látið sér félagsstörf íþróttahreyfingarinnar varða. Framtíðarsýn og metnaður Tönju fyrir Breiðablik er í samræmi við sýn aðalstjórnar og höfum við miklar væntingar til samstarfsins.
Fyrir hönd aðalstjórnar vil ég þakka fráfarandi framkvæmdastjóra, Eysteini Pétri fyrir hans mikilvæga framlag til Breiðabliks sl. ellefu ár og velfarnaðar í nýju starfi. Það er óhætt að segja að félagið hafi tekið stakkaskiptum undir hans stjórn og samstarfið hefur verið einstakt,“ sagði Ásgeir Baldursson, formaður Breiðabliks, um málið.
Draumur Tönju
„Það er mér mikill heiður að ganga til liðs við Breiðablik og starfa með því öfluga fólki sem kemur að öllum deildum félagsins. Íþróttir eru mitt aðaláhugamál og hefur það alltaf verið ákveðinn draumur að starfa á því sviði. Ég er því spennt að takast á við þau verkefni sem felast í áframhaldandi uppbyggingu og sókn þessa frábæra félags,“ sagði Tanja Tómasdóttir um ráðninguna.