Dusty er nýr Íslandsmeistari í Counter Strike eftir 3:1 sigur á Þór í hörkuspennandi úrslitaviðureign Ljósleiðaradeildarinnar í kvöld.
Spilað var eftir „best of five“ fyrirkomulagi þannig að það lið sem varð fyrra til að vinna þrjá leiki af fimm stóð uppi sem sigurvegari.
„Við vorum furðurólegir og þetta var ekki mikið stress. Við vorum bara tilbúnir, erum bara orðnir vanir og kunnum að díla við þessa pressu,“ sagði Þorsteinn Friðfinnsson, einn lykilmanna Dusty, sem spilar undir leikjanafninu THOR eftir að úrslitin lágu fyrir.
Þrátt fyrir nokkuð afgerandi lokatölurnar var úrslitakeppnin æsispennandi og mikil tilfinningahiti í áhorfendum sem troðfylltu Arena á Smáratorgi þar sem liðin mættust.
Þór komst í úrslit með sigri á liði Ármanns á þriðjudaginn en Dusty stimplaði sig síðan sannfærandi inn með því að leggja Veca í seinni undanúrslitaleiknum á fimmtudaginn.