Fjölmiðlakonan Edda Falak lætur lögregluna heyra það í færslu sem hún birtir á Twitter. Þar greinir hún frá því að lögreglan hafi ekkert aðhafst þegar hún tilkynnti menn sem sögðu ætla að nauðga henni í sendiferðabíl.
Edda skrifar: „Tilkynnti hatursummæli þar sem menn plönuðu að nauðga mér í sendiferðabíl og óskuðu eftir fólki og bíl til þess að verknaðurinn gæti átt sér stað. Ég skil að það er mikið að gera en ég fékk aldrei svar frá lögreglunni. Ég væri nefnilega líka til í að komast lifandi heim.“
Með þessu deilir hún frétt Vísis þar sem vitnað var í orð Fjölnis Sæmundssonar, formanns Landssambands lögreglumanna, sem sagðist sleginn yfir fréttum um möguleg hryðjuverk á árshátíð lögreglumanna. „Við viljum öll komast lifandi heim úr vinnunni,“ sagði Fjölnir.