Femínistar á Twitter eru ekki allskosta sáttar með frétt sem birtist á Vísi í dag þar sem fjallað var um stöðu Gylfa Þórs Sigurðssonar fótboltamanns. Hann hefur verið í farbanni í um fimmtán mánuði eftir að hafa verið handtekinn í tengslum við rannsókn á kynferðisbroti gegn einstaklingi undir lögaldri.
Í þeirri frétt er meðal annars rætt við Sigurð Aðalsteinsson, föður Gylfa, en hann segir Gylfa hafa lagt sig fram fyrir Íslands hönd í tíu til fimmtán ár.„Aldrei dregið af sér. Verið toppíþróttamaður. Lagt sig fram fyrir land og þjóð. Þetta eru þakkirnar. Hann fær ekkert,“ er haft eftir Sigurði.
Edda Falak vekur sérstaklega athygli á þessum bút og skrifar á Twitter: „Samfélagið krefst þess að kynferðisbrotamönnum sé refsað fyrir brot sín, en um leið minnir það brotaþola á að ef þú ætlar að kæra að þá er eins gott að þú getir sýnt fram á alvöru skrímsli en ekki einhvern vatnsgreiddan fótboltamann sem hefur FÓRNAÐ SÉR FYRIR LAND OG ÞJÓÐ.“
Annar femínisti og meðlimur hópsins Öfgar, Tanja Ísfjörð, stingur líka niður penna vegna fréttar Vísis. Hún gagnrýnir þó sérstaklega Gauta B. Eggertsson, prófessor í hagfræði við Brown-háskóla í Bandaríkjunum. Hann telur bresk yfirvöld brjóta á mannréttindum Gylfa með því að draga málið svo á langinn.
Tanja skrifar: „Myndi frekar hafa áhyggjur af stöðu þolenda á Íslandi (sem og annarsstaðar) og þeirra málum heldur en stöðu manns sem lögreglan í Bretlandi er með í haldi vegna þess að þau telja hann sekan um brot.“
Maður nokkur segir að þetta tvennt útiloki ekki hvort annað. Því svarar Tanja: „Geri mér fulla grein fyrir því. Myndi kjósa að frekar sé orkunni eytt í þolendur en meinta gerendur þegar hallar svona rosalega á þolendur.“