Eðvald Jóhannsson er látinn, 79 ára að aldri.
Eðvald hefði orðið áttræður í apríl en hann lést á Heilbrigðisstofnun Austurlands í Neskaupsstað 24. febrúar síðastliðinn. Bjó Eðvald ásamt eiginkonu sinni Vilborgu Vilhjálmsdóttur á Furuvöllum 5, Egilsstöðum.
Eðvald fæddist og ólst upp á Þrándarstöðum í Eiðaþinghá en hann var sonur Jóhanns Valdórssonar og Huldu Stefánsdóttur en fjölskyldan var afar stór en Eðvald átti tíu systkini. Sjálfur átti hann svo átta börn.
Eðvald var afar vel liðinn á Héraði og víðar en hann vann í mörg ár í verslun Essó, síðar N1. Þá rak hann aukreitis Bílasöluna Fell um árabil en einnig ráku þau hjónin gistiheimili á Randabergi, þar sem þau bjuggu í fjöldi ára. Þá var hann einnig þekktur fyrir kjötið sem hann reykti fyrir vini og vandamenn fyrir jólin. Eðvald var hress og skemmtilegur og verður sárt saknað í samfélaginu fyrir austan.
Mannlíf sendir fjölskyldu og vinum Eðvalds innilegar samúðarkveðjur.