Veitingastaðurinn Laugaás mun hætta starfsemi innan skamms en á Facebook eru margir sem syrgja fráhvarf veitingastaðarins. Þar á meðal er Egill Helgason en hann skrifar:
„Veitingastaðurinn Laugaás er að loka dyrum sínum í hinsta sinn. Það eru kannski ekki margir sem muna hvílík bylting það var þegar Laugaás og Hornið opnuðu árið 1979. Jónas Kristjánsson ritstjóri lýsir þessu vel í grein sem hann skrifaði í febrúar 1980. Það voru annað hvort fín veitingahús, oft á hótelum, eða búllur.“
Egill segir að um svipað leyti hafi Íslendingar farið að venja sig á betri drykkjumenningu. „Þetta rann svo saman við svokallaða léttvínsbyltingu. Vegna breytinga á lögum eða reglugerðu gátu Íslendingar allt í einu farið að drekka léttvín nokkuð óhindrað á veitingastöðum – áður hafði þungi vínsölunnar farið í að beina fólki að sterkum vínum. Mottóið var eiginlega: Drekkum sjaldnar og mikið, fremur en drekkum oftar og lítið. Hornið var með ítalskan mat en Laugaás gerði mikið út á fiskrétti – þetta var þegar Íslendingar voru rétt að læra að elda fisk á sómasamlegan hátt, mauka hann ekki og ofsjóða. Þetta sagði Jónas og svona upplifði maður það,“ segir Egill og deilir myndinni hér fyrir neðan.
