Hilda Allansdóttir göngugarpur gekk á dögunum fram á mann sem var að svala sér kynferðislega á hesti. Hilda segir í samtali við DV að maðurinn hafi verið afar vandræðalegur og forðað sér. Hann hafi talað ensku og tekið afskiptum hennar illa, steytti að henni hnefa og hrópaði: „You are just making trouble. Go away“.
„Ég kem að honum og manninum bregður rosalega. Hann lagðist þarna með buxurnar niður um sig. Ég hringi strax í lögregluna og er í raun með hana í eyranu allan tímann á meðan ég elti hann upp úr dalnum,“ lýsir Hilda.
Hún elti manninn að tilmælum lögreglu en dýraníðingurinn náði að sleppa, flúði inn í skóglendi fyrir ofan Reykjalund. Síðastliðinn mánudag rakst hún þó aftur á manninn.
„Ég hleyp alltaf á morgnana en á mánudeginum er ég í fríi. Vanalega tek ég fjallahlaup en þennan dag ákvað ég á hlaupa inn í Reykjahverfi. Ég hljóp inn í undirgöngin við Brúarland í átt að Álafosskvosinni. Ég er komin inn í göngin þegar ég sé sama manninn. Ég þekkti töskuna hans og klæðnaðinn.“
Lögregla náði þá að handtaka manninn. Nánar má lesa um málið á DV.