Frammistaða blaðakonunnar Ernu Ýrar Öldudóttur á borgarafundi um loftslagsmál sem sýndur var á RÚV á þriðjudaginn hefur vakið mikil athygli.
Erna Ýr var ein þeirra sem tók þátt í pallborði til að ræða loftslagsmál. Aðrir sem tóku þátt voru m.a. rithöfundurinn Andri Snær Magnason, jarðfræðingurinn Sævar Helgi Bragason og veðurfræðingurinn Elín Björk Jónasdóttir.
Erna Ýr birti pistil um fundinn í gær undir yfirskriftinni Hrútskýringar, trúarhiti og kennivaldshroki á borgarafundi Kastljóss.
Í pistli sínum greinir Erna frá því að hún hafi frá upphafi efast um að samkoman yrði „hlutlaus“.
„En ég lét mig þó hafa það og ákvað að mæta til opinberrar aftöku, með hrútskýringum og kennivaldshroka í beinni útsendingu á ríkisfjölmiðlinum. Þar sem að bæði þáttastjórnendur, þau Jóhanna Vigdís Hjaltadóttir og Einar Þorsteinsson létu það óátalið að ég og hinn efasemdarmaðurinn, Magnús Jónsson, veðurfræðingur og f.v. veðurstofustjóri, værum endurtekið uppnefnd „afneitunarsinnar“ í þættinum, ætla ég að kalla þá sem trúa á loftslagsvána „hina heittrúuðu“ framvegis,“ skrifar Erna Ýr sem er ein þeirra sem efast um að loftslagsbreytingar séu af mannavöldum.
Á fundinum gerði Erna Ýr tilraun til að færa rök fyrir því að umræðan um loftslagsmál væri byggð á upplýsingum frá þeim sem hafa fjárhagslegra hagsmuna að gæta.
„Eitt af því sem ég tók eftir var að flestir hinna heittrúuðu var fólk sem hefur beinlínis hagsmuni af því að vera staðföst og boða trúna á loftslagsvána, en í því samhengi ætla ég að telja upp hverjir það voru. Guðmundur Ingi Guðbrandsson, umhverfisráðherra, með stóra drauma um skattpíningar, boð og bönn í þágu umhverfismála. Dagur B. Eggertsson, borgarstjóri, sem þarf að koma borgarbúum í strætó og selja þeim hugmyndina um borgarlínu. Andri Snær Magnason, rithöfundur, sem verður að selja bók um loftslagsvána fyrir jólin,“ skrifar Erna m.a. um nokkra þeirra sem tjáðu sig á fundinum.
„…bæði vísindamenn og þáttastjórnendur töluðu um hina ósönnuðu tilgátu vísindanna um hlýnun loftslagsins af mannavöldum sem staðreyndir.“
Erna segir þá frá því að henni hafi liðið eins og hún væri stödd í sjónvarpssal á trúarlegri stöð. „Meðal annars vegna þess hvernig bæði vísindamenn og þáttastjórnendur töluðu um hina ósönnuðu tilgátu vísindanna um hlýnun loftslagsins af mannavöldum sem staðreyndir. Slíkur var trúarhiti þáttastjórnenda, vísindamanna og vel upplýsta fólksins í panelnum.“
Svo tínir hún saman ummæli sem hún kallar „brot af því besta úr þættinum.“
Pistil Ernu má lesa í heild sinni á vef Viljans.