Er til svo kurteis þjóð að jafnvel þjófarnir bera sig eins og breskir bötlerar? Ja, það þykir kannski ekki góð latína nú til dags að alhæfa með svona spurningum og hvað þá þegar þjóðerni eiga í hlut. En hvað sem því líður heldur Jón Sigurður Eyjólfsson því fram að Hollendingar séu allir kurteisir.
Byggir hann þetta á því að hann hafi ekki hitt einn sem ekki ber sig eins og annálað prúðmenni og hefur hann þá hitt margan Hollendinginn og ekki alla við heppilegar aðstæður. Til dæmis var hann rændur í Amsterdam sumarið 1994 þar sem hann var á hjólaráfi um miðja nótt en þrátt fyrir að reynslan hafi verið óskemmtileg var ekki um að kenna fantaskap þjófanna því þeir báru sig eins og háttprúðum Hollendingum sæmir. Að ránu loknu vildu þjófarnir spjalla við Íslendinginn, eins og kurteisra er háttur, og verða honum samferða á hjólinu. Kannski ekki nema von að Íslendingurinn hafi þetta háa álit á mannasiðum þessarar þjóðar.
Jón Sigurður segir frá þessum raunum í þætti sínum Rúntað á Rucio en þar bregður hann sér líka á gamla Hótel Ísland þar sem hin portúgalska Maríza söng fyrir frónbúann árið 2005. Birtist þátturinn á vef Mannlífs í kvöld.