Í nýjustu mánaðarskýrslu hagdeildar Húsnæðis- og mannvirkjastofnunar kemur fram að kaupsamningar um íbúðarhúsnæði hafi ekki verið færri síðan í aprílmánuði árið 2015, ef miðað er við sex mánaða hlaupandi meðaltal. Íbúðir seljast síður mikið yfir ásettu verði. Það eru því blikur á lofti á fasteignamarkaðnum, en í skýrslunni segir að fyrstu merki kólnunar geri nú vart við sig.
Á höfuðborgarsvæðinu nam verðhækkun á íbúðum í fjölbýli aðeins um 0,5 prósentum í júní, en fimm mánuðina þar á undan hafði mánaðarleg hækkun numið á bilinu 2,4 til 3,2 prósentum.
Seðlabanki Íslands hefur hækkað stýrivexti ört síðustu misseri, en hækkunin nam tveimur prósentustigum í maí og júní. Auk þess setti Seðlabankinn strangari lánaskilyrði í lok júní. Þessi atriði eru meðal þeirra sem auka líkur á kólnun á húsnæðismarkaði, eins og kom fram í síðustu mánaðarskýrslu hagdeildar Húsnæðis- og mannvirkjastofnunar.
„Þótt helstu mælikvarðar um fasteignamarkaðinn eru ekki ótvíræðir eru þó líklega komin fram fyrstu merki um kólnun á fasteignamarkaði,“ segir í nýjustu skýrslunni.
Eitt af þeim merkjum sem eru til staðar um kólnum á fasteignamarkaði er aukið framboð íbúða, en framboð jókst mjög á höfuðborgarsvæðinu í ágúst; úr 700 í 905 á 20 dögum. Framboð íbúða á höfuðborgarsvæðinu hefur rúmlega tvöfaldast frá byrjun febrúar á þessu ári.
Íbúðir seljast enn yfir ásettu verði, en þeim sem seljast 5 prósent eða meira yfir ásettu verði hefur þó fækkað talsvert. Í apríl seldust til að mynda 34,6 prósent íbúða í fjölbýli á höfuðborgarsvæðinu svo hátt yfir ásettu verði, á meðan þær voru orðnar 20,8 prósent í júní.