Félagið Ísland – Palestína sendi rétt í þessu frá sér harðorða yfirlýsingu vegna stríðsins á milli Hamas og Ísraels.
Yfirlýsinguna má lesa hér:
Yfirlýsing frá Félaginu Ísland – Palestína
– Við fordæmum árásir og morð á almennum borgurum – undantekningarlaust!
– Við fordæmum morðárásir Ísraelshers á innilokaða íbúa Gaza!
— Við fordæmum morð og ofbeldi Ísraelshers gegn Palestínumönnum á Vesturbakkanum!
– Við fordæmum svik alþjóðasamfélagsins, sérstaklega forystu Vesturlanda, við Palestínu í áratugi!
Yfirstandandi hernaður Ísraelshers, úr lofti, láði og legi, á innilokaða íbúa Gazastrandarinnar er afleiðing þess að stjórnvöld í Ísrael hafa í áratugi getað stundað þjóðernishreinsanir og byggt upp ríki aðskilnaðarstefnu og ofbeldis.
Í sjötíu og fimm ár hefur Ísrael brotið alþjóðalög, lög gegn stríðsglæpum, lög gegn landráni, lög gegn meðferð á hernumdu fólki – án afskipta alþjóðasamfélagsins.
Allt tal um friðarviðræður og tveggja ríkja lausn er innihaldslaust þegar Ísrael hefur frelsi til þess að taka allt það land sem þeim sýnist, byggja ólöglegan aðskilnaðarmúr og stela vatni Palestínu – sem er grundvöllur alls lífs.
Aðeins tvö Vesturlanda hafa viðurkennt ríki Palestínu, Ísland og Svíþjóð. Það er því tómt tal af hálfu Bandaríkjanna, Bretlands, ESB ríkja ofl. að tala um tveggja ríkja lausn og viðurkenna eingöngu tilvist Ísraels!
Allt tal um alþjóðalög er innihaldslaust þegar annar aðilinn hefur frelsi til að brjóta þau að vild án viðurlaga. Þórdís Kolbrún utanríkismálaráðherra hefur rætt um mikilvægi alþjóðalaga fyrir smáríki eins og Ísland. Er ekki augljóst að beiting alþjóðalaga, sem er ætlað að vernda þjóðir og minnihlutahópa, eru grundvallaratriði í baráttu Palestínumanna. Allt tal um mikilvægi alþjóðalaga og alþjóðlegra sáttmála, án þess að leitast við að beita þeim til að vernda Palestínumenn, er hræsni.
Hernám Ísraels á landi Palestínu er búið að standa rúma hálfa öld. Ísrael hefur sölsað undir sig allt land nema litla skika hér og þar. Palestínumenn geta ekki ferðast um í eigin landi nema að geðþótta hernámsliðsins. Hernámsliðið hefur fangelsað þúsundir Palestínumanna, jafnt börn sem fullorðna. Mörg hundruð fanga er haldið án ákæru og á annað hundrað börn sitja núna í fangelsi fyrir að sýna hernámsliðinu andúð sína. Palestínumenn eru fjórtán milljónir, helmingur þeirra eru flóttamenn víða um heim, m.a. hér á landi. Sjö milljónir lifa undir hernámi, herkví og óréttlátum lögum Ísraelsríkis. Er ekki mál að linni?
Nú stendur yfir stórfelld árás á fólkið á Gaza, spítalar eru yfirfullir og Ísraelsher hefur lokað fyrir vatn, rafmagn og stöðvað flutning á mat, eldsneyti og lyfjum til innilokaðra Gazabúa. Þessi aðgerð er stríðsglæpur. Stjórnvöld Vesturlanda hafa nú náð nýjum hæðum í hræsni sinni og ætla að stöðva allan stuðning við Palestínu – til þess að styðja árás Ísraels. Einhliða fordæming vestrænna leiðtoga á Hamas er í raun skotleyfi á Palestínumenn.
Við krefjumst þess að árásum Ísraelshers á Gaza og á Vesturbakkanum verði tafalaust hætt!
Lifi frjáls Palestína!