Á morgun er von á bandarískri flugveit til landsins til að sinna loftrýmisgæslu Atlantshafsbandalagsins við Ísland.
Íslendingar þurfa ekki lengur að óttast árásir á landið því bandarísk flugsveit mun frá og með morgundeginum annast loftrýmisgæslu Atlantshafsbandalagsins yfir Íslandi. Samkvæmt Landhelgisgæslunni kemur flugsveitin til landsins frá Þýskalandi, með fjórar F-16 herþotur og 120 liðsmenn.
Flugsveitin tekur þátt í verkefninu auk starfsmanna stjórnstöðva Atlantshafsbandalagsins í Udem í Þýskalandi og á öryggissvæðinu á Keflavíkurflugvelli.
Ef veður leyfir, er gert ráð fyrir aðflugsæfingum sveitarinnar á varaflugvöllum á Akureyri og Egilsstöðum dagana 21. til 27. október.
Sama fyrirkomulag verður á framkvæmd verkefnisins og undanfarin ár og í samræmi við loftrýmisgæsluáætlun Atlantshafsbandalagsins fyrir Ísland, að því er kemur fram hjá Landhelgisgæslunni.
Mun flugsveitin verða með aðsetur á öryggissvæði Keflavíkurflugvallar auk flugsveita aðildarríkja Atlantshafsbandalagsins er sinna kafbátaeftirliti úti fyrir stöndum landsins.
Varnarmálasvið Landhelgisgæslu Íslands annast framkvæmd verkefnisins í samstarfi við Isavia, í umboði utanríkisráðuneytisins. Gert er ráð fyrir að loftýmisgæslunni ljúki um miðjan nóvembermánuð.
Ljósmynd: Landhelgisgæslan/Árni Sæberg.