Halla Tómasdóttir, forseti Íslands, hefur sent frá sér yfirlýsingu í sambandi við mögulegt þingrof og komandi kosningar. Hægt er lesa tilkynninguna hér fyrir neðan.
„Nú í morgun gekk Bjarni Benediktsson forsætisráðherra á minn fund og
lagði fram tillögu um þingrof og í kjölfarið almennar kosningar til
Alþingis í lok nóvember. Samkvæmt tillögu ráðherra situr ríkisstjórnin
fram til kosninga.
Fallist ég á tillögu forsætisráðherra um þingrof skal samkvæmt 24.
greinar stjórnarskrár boða til kosninga áður en 45 dagar eru liðnir frá því
tilkynnt er um þingrofið.
Ég hef átt samtöl við forsætisráðherra síðustu daga og í gærkvöldi
ræddi ég við formenn hinna stjórnmálaflokkanna sem eiga aðild að
núverandi ríkisstjórn. Ég hyggst nú gefa mér tíma til að ræða einnig við
formenn allra flokka sem sæti eiga á Alþingi. Að þeim fundum loknum
mun ég leggja mat á stöðu mála áður en ég tek afstöðu til tillögunnar. Ég
mun svo gera grein fyrir ákvörðun minni síðar í vikunni.
Ég mun ekki taka spurningar í dag enda hef ég engu við þetta að
bæta að sinni.“