„Það er segin saga að eftir því sem stjórnarfar verður sturlaðra verða úrslitin í kosningum stórfenglegri. Nú fær Pútín 87 prósent. Dugar ekki minna til að halda einvaldinum og dyntum hans ánægðum. Þessi tala á bara eftir að hækka.“ Þannig hljóðar Facebookfærsla Egils Helgasonar fjölmiðlamanns sem hann birti í gær. Ekki voru allir sáttir við færsluna.
Egill Helgason átti í stuttum en snörpum orðaskiptum við Moskvubúann Hauk Hauksson, fréttamann á Útvarpi Sögu, í athugasemdakerfinu við færslu Egils sem birt er hér fyrir ofan. Haukur er síður en svo ánægður með færsluna: „Svona frasar Egill Helgason minn! Þú neitar því semsagt að hann hafi stuðning heimamanna, annað en pólitískir dvergar Westurrlanda, sofandi draugar, kokainistinn/trúður. Eða EU dúkkur neocona. Eða Þú berð enga virðingu fyrir russneri þjóð – það er löngu vitað.“
Þessu svaraði Egill að bragði: „Ég ber ekki virðingu fyrir ofbeldisseggjum sem láta drepa andstæðinga sína og iðka stórfellt kosningasvindl til að svala egói sínu. Rússum vorkenni ég að búa við þessa skelfingu og endalausu lygar og blekkingar. Hræðileg saga.“
Haukur svaraði þessu en Egill hefur ekki þó það svaravert: „Bullshit og slagorða frasar, lygi . Biden-feðgar þínir menn.“