- Auglýsing -
Frumvarp félags- og barnamálaráðherra um lengingu fæðingar- og foreldraorlofs gerir ráð fyrir því að réttur foreldra til fæðingarorlofs lengist úr níu mánuðum í tólf. Orlofið verður lengt í tveimur áföngum.
Heildarkostnaður við fyrri áfanga er um 1,7 milljarður króna og með honum er áætlað dagar feðra í fæðingarorlofi muni aukast um 33%. Einn mánuður mun bætast við sjálfstæðan rétt hvors foreldris um sig vegna barna sem eru fædd, ættleidd eða tekin í varanlegt fóstur á árinu 2020. Sameiginlegur réttur foreldra verður hins vegar tveir mánuðir í stað þriggja.
Seinni áfanginn er talinn kosta um 3,2 milljarða. Annar mánuður bætist við sjálfstæðan rétt hvors foreldris vegna barna sem fæðast, eru ættleidd eða tekin í varanlegt fóstur 2021. Þá verður réttur hvors foreldris um sig fimm mánuðir auk tveggja mánaða sem foreldrar geta skipt sín á milli.
Tillögurnar eru í samræmi við yfirlýsingu stjórnvalda í tengslum við gerð lífskjarasamningsins.