Björn Birgisson vill þjóðnýta HS Orku.
Samfélagsrýnirinn frá Grindavík, Björn Birgisson rifjar upp í nýrri Facebook-færslu, þegar Hitaveita Suðurnesja var og hét en hún var upphaflega stofnuð 1974 og var þá í eigu allra sex sveitarfélaganna sem þá voru á Suðurnesjum.
„Síðar hélt frjálshyggjan innreið sína í opinberar eigur – ófær um að byggja neitt upp sjálf, en þess albúin að komast yfir eigur almennings með öllum tiltækum ráðum.
Aðallega óheiðarlegum,“ skrifar Björn í færslunni og bætti við: „Hitaveita Suðurnesja var einkavædd og skipt upp í HS Veitur og HS Orku. Sú er staðan núna. Hagnaðurinn af rekstrinum fer alltaf til einkaaðila.“
Björn segir í næstu setningu að nú eigi að byggja varnargarða um mannvirkin í Svartsengi og að eigendur þeirra borgi ekki krónu fyrir það, heldur almenningur með viðbótarskatti. „Hér má æla.“
Að endingu segir Björn að þetta sé mjög gott dæmi um það hvernig gróðinn er einkavæddur en tap á hinn bóginn sé ríkisvætt, ásamt óvæntum kostnaði. „Það er algjörlega borðliggjandi að þjóðnýta á orkuverið í Svartsengi.“