Það var rétt fyrir klukkan hálf þrjú í nótt þegar óskað var eftir aðstoð lögreglu í hverfi 108 vegna líkamsárásar. Árásaraðilinn var handtekinn og vistaður í fangageymslu en sá er einnig grunaður um akstur undir áhrifum áfengis. Lögregla skoðaði bifreiðar í Laugardal og Fossvogi í nótt og klippti skráningarmerki af níu ökutækjum. Frestur til að færa þau til skoðunar var löngu útrunninn.
Lögregla hafði afskipti af manni sem grunaður var um vörslu fíkniefna. Maðurinn brást illa við afskiptum lögreglu og hótaði lögregumönnum bæði lífláti og barsmíðum. Sá var handtekinn og verður kærður fyrir ofbeldi gegn opinberum starfsmanni. Í Hafnarfirði kviknaði eldur í gömlu húsnæði og var húsið alelda á nokkrum mínútum. Slökkviliðið lauk störfum klukkan þrjú í nótt en húsnæðið er gjörónýtt.
Fyrr um kvöldið var lögregla kölluð út í Breiðholtið vegna stórfelldrar líkamsárásar. Þar hafði aðili verið sleginn ítrekað í höfuðið með hamri en ekki liggur fyrir hverjir voru að verki. Þolandinn var fluttur á spítala til aðhlynninar en síðar um kvöldið var hann tilkynntur á pizza stað í borginni þar sem hann stóð og pantaði sér pizzu í spítalafötunum.