Kristinn Hrafnsson gerir stólpagrín að íslenskum veruleika og ríkisstjórninni í nýrri Facebook-færslu.
Ritstjórinn hvíthærði er þekktur fyrir sinn beitta húmor og háðsádeilur og í nýjustu færslu sinni á Facebook er engin undantekning þar á. Í henni gerir Kristinn stólpagrín að ríkisstjórninni og ástandinu á bráðamóttöku Landsspítalans í bland við fleira í íslensku samfélagi sem grátbroslegt er. Færslan er hér í heild sinni:
„Ríkisstjórnin hefur hækkað viðbúnaðarstig vegna viðvarandi ógnar sem hefur skapast með álagi á bráðamóttöku Landspítalans. Ótti hefur gripið um sig í samfélaginu vegna þeirrar hættu að geta ekki treyst á viðbragðssþjónustu heilbrigðiskerfisins. Fólk þorir ekki úr húsi af ótta við að lenda í slysi í hálkunni og bíða klukkustundum saman eftir aðhlynningu.
Þjóðaröryggisráð Íslands (ÞÖRÍ) hefur verið kallað til fundar í bönkernum á Keflavíkurflugvelli til að fjalla um bráðavanda bráðaþjónustunnar en hefur ekki komist til þangað til fundar vegna ófærðar á Reykjanesbraut. Þess í stað hefur ÞÖRÍ tekið boði Samherja um að funda í höfuðstöðvum fyrirtækisins við Borgartún gegn beiðni fyrirtæksins um að Brynjar Níelsson og Páll Vilhjálmsson klippi til Skaupið enda fyndnustu menn Íslands.
Prófessor í stjórnmálafræði við Háskólann á Hellu hefur lýst því yfir að þessi vandi ógni stöðugleika allra NATO ríkja og vill að Varnarsamningurinn við Bandaríkin sé virkjaður til að leysa málið. „Sem stendur er bráðamóttakan veikasti hlekkurinn í vörnum Vestrænna lýðræðisríkja“, segir prófessorinn og vill biðla til vinaþjóðarinnar í vestri að senda hingað liðsafla lækna og hjúkrunarfólks um leið og búið er að grafa það úr fönn í Böffaló í Bandaríkjunum.
Á meðan býður Ríkislögreglustjórinn upp á sérstakan fjölskylduafslátt af fjölskotavopnum í tilefni áramótanna og leggur um leið til lausn á fráflæðisvanda Bráðamóttökunnar með langtímavistunum á Hólmsheiði.
Fréttin er í vinnslu.“
