Hinn geðþekki sjónvarpsmaður, Gísli Marteinn Baldursson, vill meina að það séu til fullt af möguleikum til að reisa nýjan innanlandsflugvöll og færa hann því úr Vatnsmýrinni. Hann telur að reynt verði að tefja og flækja málið endalaust til að skemma fyrir þróun Reykjavíkurborgar.
Þetta kemur fram í máli Gísla Marteins á Twitter. Við skulum gefa sjónvarpsmanninum hreinlega orðið:
„Svo það sé sagt: Það er nóg af stöðum fyrir innanlandsflugið: KEF, Álftanes, Löngusker, Hólmsheiði, Hvassahraun. Íhaldið ætlar sér að tefja og flækja öll mál og hefði gert það í Hvassahrauni þótt ekkert hefði gosið. Þau dýrka að hafa flugvöll sem skemmir framtíðarmöguleika RVK,“ segir Gísli og heldur áfram:
„Ég skil mjög vel að þetta sé þægilegt fyrir þau sem koma utan af landi og eiga erindi í miðborgina. En það verður líka frábært fyrir alla íbúa landsins að eiga ennþá betri og sterkari höfuðborg sem gaman er að sækja heim. Innanlandsflugið getur verið annarsstaðar, miðborgin ekki.“