Ekkert bendir til þess að sögusagnir um að skipulagður glæpahópur sé viðriðinn morðið á Kolfinnu Eldeyju Sigurðardóttur séu réttar, samkvæmt Grími Grímssyni, yfirlögregluþjóni hjá lögreglunni á höfuðborgarsvæðinu.
Miklar sögusagnir eru í samfélaginu um að skipulagður glæpahópur sé tengdur morðinu á hinni 10 ára Kolfinnu Eldeyju á sunnudagskvöld. Mannlíf heyrði í Grími Grímssyni, yfirlögregluþjóni hjá miðlægri rannsóknardeild lögreglunnar á höfuðborgarsvæðinu og spurði hann út í þær sögusagnir. „Þannig er það almennt séð með sögusagnir, að á meðan ekkert concrete (ísl. áreiðanlegt) kemur fram, þá erum við ekkert á eftir því. Við erum á eftir því sem getur gefið raunsannar upplýsingar sem varða rannsóknina,“ svaraði Grímur og bætti við: „En við erum ekki á höttunum á eftir sögusögnum, við getum bara ekki eytt tíma í það.“
Aðspurður sérstaklega út í þessar sögusagnir, að skipulagður glæpahópur sé þátttakandi í morðinu á Kolfinnu Eldeyju, hvort eitthvað áreiðanlegt hafi komið fram í þeim, svaraði Grímur einfaldlega: „Nei“. Bætti hann svo við: „En það má þá hvetja fólk sem er með upplýsingar um þetta mál að koma því á framfæri við lögregluna en ekki á spjallgrúbbum á internetinu.“