Guðbjörn Reynir Guðsteinsson, fyrrverandi skólastjóri lést á Hrafnistu í Hafnarfirði miðvikudaginn 5. febrúar. Hann var 91 árs.
Það var 10. maí 1933 sem Reynir fæddist í Vestmannaeyjum. Faðir hans var Guðsteinn Ingvar Þorbjörnsson skipstjóri og móðir hans var Guðrún Margrét Guðmundsdóttir húsfreyja.
Árið 1957 lauk Reynir kennara- og söngkennaraprófi frá Kennaraskóla Íslands, BA-prófi í uppeldis- og sálarfræði frá HÍ árið 1983 og árið 1996 prófi í barna- og unglingaráðgjöf frá Kennaraháskólanum í Kaupmannahöfn.
Frá 1957 til 1958 kenndi Reynir við Hlíðardalsskóla en tók við skólastjórastöðu við Barnaskóla S.D.A. í Reykjavík frá 1958 til 1962. Þá var hann skólastjóri Barnaskóla S.D.A. í Vestmannaeyjum frá 1962 til 1966 og skólastjóri Barnaskólans í Vestmannaeyjum frá 1966 til 1970. Frá 1979 kenndi hann við Snælandsskóla í Kópavogi en ári seinna varð hann yfirkennari skólans og skólastjóri hans frá 1984. Haustið 2000 fór Reynir á eftirlaun en vann eftir það til ársins 2012 fyrir Skólaskrifstofu Kópavogs við greiningar og ráðgjöf vegna lesblindra nemenda í grunnskólum Kópavogs.
Samkvæmt mbl.is sem sagði frá andláti hans, segir að Reynir hafi verið virkur í félagsstarfi í Vestmannaeyjum, í starfi safnaðar aðventista, hjá Alþýðuflokkunum, íþróttahreyfingunni og í söngfélögum. Þá var hann bæjarfulltrúi 1970-1978 og forseti bæjarstjórnar 1977-1978. Reynir var formaður undirbúningsnefndar fyrir stofnun framhaldsskóla í Vestmannaeyrjum en eftir að hann flutti upp á land var hann meðal annars formaður Kennarafélags KSK til fjölda ára, sat í stjórn Kennarasambands Íslands 1982 til 1984 og í stjórn Rauðakrossdeildar Kópavogs 2000-2008.
Þá var Reynir einn af heiðursfélögum Karlakórs Reykjavíkur, þar sem hann sat lengi í stjórn, og var formaður ritnefndar um sögu kórsins. Eftir Reyni liggja greinar um ýmiskonar efni og þýdd og frumort ljóð við ýmis lög.
Fyrrverandi eiginkona Reynis var María Júlía Helgadóttir en þau skildu. Saman áttu þau börnin Maríu Björk, Helga Ingvar og Guðmund Víði. Seinn eiginkona hans er Helga Guðmundsdóttir en börn hennar eru Guðmundur Ibsen Brynjarsson og Brynja Sif Ibsen Brynjarsdóttir