Guðmundur Karl Snæbjörnsson, sérfræðingur í heimilislækningum, fullyrðir að honum hafi verið hótað fangelsisvist fyrir að skrifa upp á Ivermectin-lyfið í kórónuveirufaraldrinum. Með því vill hann meina að honum hafi verið bannað að lækna fólk á sama tíma og margir kollegar hans hafi fengið milljónir frá lyfjafyrirtækjum. Því heldur Guðmundur að minnsta kosti fram.
Guðmundur Karl er nýjasti gesturinn í podcasti Sölva Tryggvasonar. Hann segist hafa orðið fyrir miklum árásum fyrir að ganga gegn meginstraumnum í Covid faraldrinum „Flest allir kollegar mínir sem tjáðu sig mest hér á landi, til að mynda læknar á landsspítalanum hafa fengið milljónir í styrki frá lyfjafyrirtækjum. Ég er ekki að segja að þeir séu ekki vel meinandi og eflaust gengur þeim gott til, en þeir eru ekki óháðir. Fólk sem hefur haft milljónir í rannsóknarstyrki frá lyfjafyrirtækjum er eðli málsins samkvæmt ekki frjálst og óháð,“ segir Guðmundur Karl, sem vill meina að Covid tímabilið hafi sýnt okkur mikilvægi þess að við förum í ákveðna naflaskoðun varðandi ristkoðun og óvinsælar skoðanir:
„Fólk er auðvitað upp til hópa orðið leitt á umræðum um Covid, en þessi faraldur sýndi okkur ákveðna hluti sem mega ekki endurtaka sig. Það getur ekki verið í lagi að banna upplýsingar og að það sé bara sett ein lína sem enginn má véfengja. Eins erum við komin á mjög hálan ís þegar þrautreyndum læknum er bannað að fara eftir sannfæringu sinni og þeir í raun þvingaðir til að brjóta læknaeiðinn. Heimilislæknum var á ákveðinn hátt bannað að stunda sínar lækningar. Ég er sérfræðingur í heimilislækningum til áratuga og lá yfir gögnum og rannsóknum frá upphafi faraldursins, en ég mátti ekki nota þær meðferður sem allt benti til að væri best. Réttur lækna til að lækna er í raun orðinn skertur eftir þetta tímabil,“ segir Guðmundur og nefnir þar meðal annars lyfið Ivermectin, sem var að hans sögn gert að einhvers konar samnefni fyrir samsæriskenningafólk og rugludalla:
„Þetta er þrautreynt lyf sem er nánast algjörlega án aukaverkana og hefur verið notað í áratugi á milljónir manna. Rannsóknirnar bentu strax til þess að þetta tiltekna lyf væri að gefa frábæra raun sem ein af meðferðunum við Covid. En einhverra hluta vegna var Ivermectin gert að einhvers konar bannorði. Lyf sem er með færri aukaverkanir en panodil og hefur verið gefið í 4 milljörðum skammta til mannfólks í gegnum tíðina. Við hljótum að geta verið sammála að það sé eitthvað skrýtið við þessi ofsafengnu viðbrögð gagnvart þeim læknum sem vildu nota þetta lyf. Ég var kærður af lyfjastofnun og mér var hótað fangelsisvist eins og ég væri að gera eitthvað stórhættulegt,“ segir Guðmundur og heldur áfram:
„Ég vil ekkert vera að naga í fjölmiðlana, en það gerðist oftar en einu sinni í Covid-tímabilinu að íslenskir blaðamenn hringdu í mig og vildu fá upplýsingar, en sögðu svo að þeir mættu ekki hafa neitt eftir mér. Væntanlega af því að ég var ekki á sömu skoðun og yfirvöld. Ég efast ekki um að þetta fólk sé að gera sitt besta, en aftur, þá er bara svo auðvelt að sjálfsritskoða sig þegar pressan er jafnmikil og hún var þegar faraldurinn stóð sem hæst. Þeir sem héldu fram öðrum skoðunum en sóttvarnaryfirvöld fengu á sig alls konar árásir og voru kallaðir álhattar eða samsæriskenningafólk,“ segir Guðmundur og bætir við að það hafi gerst oftar en einu sinni að fólk hafi svo snögglega skipt um skoðun þegar það veiktist sjálft af Covid:
„Það gerðist oft að fólk sem hafði haft sterkar skoðanir á Ivermectin opinberlega og tekið undir með meginstraumsumræðunni hafði svo persónulega samband við mig til að reyna að verða sér úti um lyfið.“
Viðtal Sölva við Guðmund Karl og öll viðtöl og podcöst Sölva Tryggvasonar má nálgast hér.