Guðmundur Ingi Guðmundsson og Jódís Skúladóttir sem bjóða sig fram til varaformanns hjá Vinstri Grænum lofa stjórnarslitum verði tillaga um slíkt samþykkt á landsfundi.
Margir í grasrót flokksins eru orðnir langþreyttir á ríkisstjórnarsamstarfinu í núverandi mynd og telja að flokkurinn hafi fórnað of miklu af gildum sínum á altari Sjálfstæðisflokksins og hefur flokkurinn verið ásakaður að vera hvorki til vinstri né grænn. Þrátt fyrir að vera bæði að berjast um velvild flokksmanna í kjöri sínu til varaformanns voru Guðmundur Ingi og Jódís sammála um að fylgja þyrfti vilja flokksmanna í þessum efnum.
Hvenær er komið gott?
„Ég held að það sé alveg ljóst að ef það er afgerandi niðurstaða landsfundar að slíta þá er alveg sama hver situr í forystunni, það væri ekki í takt við VG að hlusta ekki á raddir landsfundar. En við erum eins og Mummi segir á fyrsta degi og við munum taka þessa umræðu.
Ég er mjög glöð að þessi tillaga kemur fram af því það hefur verið orðræðan í grasrótinni lengi: Hvenær er komið gott? Þannig ég held að það sé mjög mikilvægt að við eigum þetta samtal og svo verður niðurstaða fundarins að koma í ljós þegar við afgreiðum ályktanir,“ sagði Jódís í samtali við Vísi um málið og var Guðmundur Ingi sammála henni.
„Ég er sammála því og tek undir með Jódísi. Við þurfum að ræða þetta. Landsfundur er lýðræðislegasti vettvangur flokksins og við erum vön því að taka samtalið í VG. Við erum þannig fólk,“ sagði Guðmundur Ingi.