Ástsæli rithöfundurinn og fyrrum alþingiskonan Guðrún Helgadóttir er látin, 86 ára að aldri.
Guðrún Helgadóttir fæddist þann 7. september árið 1935. Allra síðustu árin dvaldi hún á hjúkrunarheimilinu Mörk og lést þar síðastliðna nótt. Hún lætur eftir sig fjögur börn og fjöldann allan af barnabörnum og barnabarnabörnum.
Guðrún var einn ástsælasti barnabókahöfundur Íslandssögunnar og sat á Alþingi fyrir Alþýðubandalagið frá 1979 til 1995. Hún var forseti Alþingis frá 1988 til 1991 og þar með fyrst allra kvenna til að gegna því embætti í sameinuðu þingi.
Guðrún skrifaði fjöldann allan af barna- og unglingabókum sem hafa fyrir löngu markað spor sín í þjóðarsálinni.
Fyrsta bók hennar var sagan um tvíburana uppátækjasömu, Jón Odd og Jón Bjarna. Hún sagðist alltaf í viðtölum hafa kynnst þeim bræðrum í svefnherbergi barnanna sinna. Úr því varð þríleikur. Hún átti eftir að skrifa fleiri vinsæla þríleiki. Dæmi um aðrar mikils virtar bækur úr smiðju Guðrúnar er þríleikurinn Sitji Guðs englar, þríleikurinn Ekkert að þakka!, þríleikurinn Öðruvísi dagar og Lítil saga um latan unga. Hún skrifaði skáldsöguna Oddaflug og leikritin Óvitar, Hjartans mál og Skuggaleikur. Hún skrifaði einnig myndabækurnar Ástarsaga úr fjöllunum, Gunnhildur og Glói og Nú heitir hann bara Pétur.
Árið 1981 var gerð kvikmynd eftir bókum hennar um Jón Odd og Jón Bjarna, sem náði talsverðum vinsældum.
Guðrún Helgadóttir vann til ótal verðlauna og viðurkenninga fyrir störf sín, líka utan landssteinanna.
Í apríl árið 2020 hlaut Guðrún heiðursverðlaun IBBY á Íslandi, Sögusteininn, fyrir framlag hennar til íslenskra barnabókmennta. Þar var forseti Íslands, Guðni Th. Jóhannesson, sem afhenti Guðrúnu verðlaunin.
„Þú ert okkar Astrid Lindgren og Tove Jansson,“ sagði Guðni í ræðu sinni við tilefnið, þar sem hann þakkaði Guðrúnu fyrir störf hennar. „Bækurnar þínar eru með boðskap en líka fullar af lífi og fjöri.“