Fasteignasalinn Gunnar Bergmann Jónsson er sá sem blekktur var af meintum „fjárfesti“ frá Sviss fyrir tveimur mánuðum síðan, til að segja frá baktjaldarmakki föður síns, Jóns Gunnarssonar og sitthvað fleira.
Sjá einnig: Leynilegar upptökur með syni Jóns um baktjaldamakk: „Hafði dregið son minn á asnaeyrunum“
Sagt var frá því í morgun að Jón Gunnarsson, fráfarandi alþingismaður og aðstoðarmaður matvælaráðherra, hafi sagt frá því í Facebook-færslu og síðan í viðtali á Bylgjunni, að sonur hans hafi verið blekktur af manni sem þóttist vera svissneskur fjárfestir. Sagði hann að samtöl þeirra hafi verið tekið upp og því komið í hendurnar á blaðamönnum Heimildarinnar, þeim Helga Seljan og Aðalstein Kjartansson, sem hafi bæði hringt í þá feðga og sent tölvupósta, þar sem spurt var um efni einkasamtals Gunnars og „fjárfestisins“. Fullyrti Jón að blaðamennirnir stæðu á bak við hinn svissneska „fjárfestis“. Á Bylgjunni í morgun sagði Jón einnig að Samfylkingin tengdist málinu en vildi þó ekki fullyrða um að frambjóðendur flokksins tengist því, en bendir þó á að blaðamennirnir hafi áður unnið með tveimur frambjóðendum Samfylkingarinnar.
Jóhann Páll Jóhannsson, þingmaður Samfylkingarinnar og fyrrverandi blaðamaður kom af fjöllum þegar Mannlíf heyrði í honum við vinnslu fréttarinnar. Sagðist hann ekkert kannast við málið og hafi í raun fyrst heyrt af því þegar Mannlíf hafði samband.
Samkvæmt Jóni hefur talsverðum fjármunum verið eytt í blekkingaleikinn en Svisslendingurinn ku hafa verið með einkabíl og bílstjóra og gist á Edition hótelinu og því má leiða líkur að því að fjársterkir aðilar hafi staðið á bakvið tálbeituna.
Gunnar Bergmann, sem er löggiltur fasteignasali hjá Eignamiðlun, hefur að sögn föður hans, ráðið lögmann og hyggist fara í mál vegna leyniupptökunnar. Við hvern hefur ekki komið fram.
Ekki náðist í Gunnar við vinnslu fréttarinnar.